د اقتصادي کمېسیون د تخنیکي کمېټې نوبتي غونډه په مرمرینه ماڼۍ کې ترسره شوه

الامارة: ۱۴۴۵ جمادي الاول ۲۱
د اقتصادي کمېسیون د تخنیکي کمېټې نوبتي غونډه په مرمرینه ماڼۍ کې ترسره او له اجنډا سره سم د وړاندې شوو موضوعاتو په اړه هراړخیز بحث وشو. دغې ناستې ته د اوبو او انرژۍ وزارت له لوري د برېښنا سکټور پنځه کلن پراختیايي پلان د بحث لپاره وړاندې شوی و، چې تر هراړخیزې ارزونې وروسته په پرنسیپ کې تایید او د منظورۍ لپاره به اقتصادي کمېسیون ته وړاندې شي. د دغه پنځه کلن پلان پر اساس به په راتلونکو پنځو کلونو کې د ۳.۸ میلیارده ډالرو په ارزښت شاوخوا ۲۰۰ د برېښنا تولید مختلفې پروژې بشپړې شي، چې له مخې به یې افغانستنان د برېښنا تولید په برخه کې خودکفايۍ ته نږدې شي.
همدارنګه په دغه غونډه کې د افغانستان د غالیو تولیدوونکو او صادروونکو اتحادیې د ځمکو وېش په اړه د صنعت او سوداګرۍ وزارت په مشرۍ یوې ګډې کمېټې ته دنده وسپارل شوه، څو یاده موضوع په هراړخیز ډول وڅېړي او خپل راپور د دغه کمېټې راتلونکې غونډې ته وړاندې کړي.
همدا راز د عدلیې، مالیې، کانونو او پټرولیم او اوبو او انرژۍ وزارتونو له استازو څخه جوړې شوې کمېټې ته دنده وسپارل شوه، څو د افغانستان برېښنا شرکت، افغان ګاز تصدي او بیات پاور ترمنځ له طبیعي ګازو څخه د برېښنا د تولید درې اړخیز تړون په هراړخیز ډول وڅېړي او خپل راپور د دغه کمېټې راتلونکې غونډې ته وړاندې کړي.