کندز کې د تعلیم او تربیې مسئولینو د اشغال د خاتمې د تړون په ویاړ لویې پرتمينې غونډې جوړې کړې، انځوريز

د اسلامي امارت د تعلیم او تربيې کمېسیون مسوولینو تېره ورځ د کندز ولایت اړوند چهاردرې، ګل تپې، خان اباد او  قلعه ذال ولسوالیو په بیلا بیلو سيمو کې د اسلامي امارت او د امریکايي اشغالګرو تر منځ د اشغال د خاتمې د تړون د لمانځني په موخه لویې غونډې جوړې کړې.

په یادو غونډو کې دیني عالمانو، قومي مخورو، سپین ږیرو، ځوانانو، مجاهدینو، د مدرسو او ښوونځیو زده کوونکو او ګڼ شمېر عامو هېوادوالو ګډون کړی وو.

په غونډو کې ترانې، د علماء کرامو له لوري تقریرونه او حماسي شعرونه د ازادۍ په ویاړ وویل شول، ګډونوالو د اسلامي امارت په مشرۍ د یاد تړون د لاسلیک څخه د ملاتړ ترڅنګ د حوت (کب) لسمه د هېواد په معاصر تاریخ کې یوه له ویاړه ډکه ورځ و بلله او د امیرالمؤمنین شیخ هبة الله اخندزاده حفظه الله د پیغام هغه برخه یې تکرار کړه چې د عمومي عفوې یادونه پکې شوې وه.

سپینو بیرغونو او د تکبیر غږونه غونډې نورې هم ښکلې کړې وې، د پوهنې کمېسیون مسؤلینو چې دغه غونډې يې تنظیم کړې وې، له ګډونوالو څخه مننه وکړه چې په خپل ملي او اسلامي احساس سره یې د ازادۍ په لمانځغونډو کې ګډون وکړ، نړېوالو ته یې و ښوده چې افغانان سوله خوښي ولسونه دي او د اسلامي امارت سره  په هر حالت کې افغان ولس اوږه پر اوږه ولاړ دی.

د غونډو په پای کې د تعلیم او تربیې د مرکزي کمېسیون د مشر د مبارکۍ پیغام ولوستل شو او مازدیګر مهال لمانځغونډې د تلپاتې سولې په دعاوو سره پای ته ورسېدلې.

۳/۲/۲۰۲۰