په اوکراین احتمالي برید؛ امریکا له دغه هیواده خپلو دیپلوماتانو ته د وتلو امر کړی

د ورکړل شویو راپورونو له مخې، د امریکا د بهرنیو چارو وزارت په یوې تازه اعلامیې کې ویلي، چې د امریکا حکومت د اوکراین په پلازمېنه کیف کې د امریکایي دیپلوتانو کورنیو ته امر کړی چې له دغه هیواده ووځي.

امریکا وېره څرګنده کړې ده چې ښایي روسیه په اوکراین برید وکړي، د روسیې د برید ګواښ ورځ تر بلې د زیاتېدو په حال کې دی، امریکایي مقاماتو له همدې امله د خپلو دیپلوماتانو اېستلو ته امر کړی، په راپور کې راغلي چې دوی ځکه د غیر ضروري دیپلوماتانو د وتلو امر صادر کړی چې د برید پر وخت به و نه کړای شي له دغه هیواده ووځي، د متحده ایالاتو حکومت په اوکراین کې له خپلو دیپلوماتو غوښتي چې په عاجله توګه دې د وتلو په اړه غور وکړي.

د امریکا د باندېنیو چارو وزارت یو تن چارواکي ویلي، په اوکراین کې د شته ستونزو له امله لا هم د امریکا سفارت هلته فعال دی او شازدافیره ”کرسټینا کواین“ په دغه هیواد کې موجوده ده.

یاد چارواکي هم وېره څرګنده کړې چې هره شېبه په اوکراین د روسیې د برید احتمال شته، نوموړي په اوکراین کې له خپلو اتباعو غوښتنه کړې چې د ترانسپورت په خصوصي او سوداګریزو لارو دې له دغه هیواده ووځي.

تر اوسه لا نه ده جوته چې اوکراین کې څومره امریکایي اتباع شتون لري، خو تر دې وړاندې د متحده ایالاتو د بهرنیو چارو وزارت د چارواکي له قوله ویل شوي و، چې په دغه هیواد کې له لسو نه تر پنځلسو زرو پورې امریکایان شتون لري.

بلخوا روسیې د څو میاشتو راهیسې د اوکراین په سرحدي پوله زرګونه سرتیري، ټانکونه، جنګي موټر، توپونه او توغندي نصب کړي دي، خو مسکو لا هم ټینګار کوي چې په اوکراین د برید اراده نه لري، خو له پوځي مانورونو یې لوېدیځ وېره لري چې ښایي په روانه او یا بله میاشت کې مسکو په اوکراین برید وکړي.