سوډان کې تاوتریخوالی؛ امنیتي کسانو یو شمېر لاریونوال وژلي

د سوډان پوځ ضد لاریونونو کې امنیتي ځواکونو پر لاریونوالو ډزې کړي، له امله یې د اوو کسانو د وژل کېدو راپورونه ورکړل شوي دي، بلخوا د ملګرو ملتونو امنیت شورا په خرطوم کې له چارواکو غوښتي چې د لاریونوالو پر وړاندې له پوره زغم څخه کار واخلي.

د ملګرو ملتونو امنیت شورا اوو غړو چې برېتانیا او فرانسه هم پکې شامله ده د سوډان له چارواکو غوښتنه کړې، چې د لاریونوالو پر وړاندې له تاوتریخوالي ډډه وکړي، ستونزې د خبرو له لارې حل کړي او د بیان ازادۍ ته ژمن پاتې شي.

د دوشنبې په ورځ د پلازمېنې خرطوم په ګډون ګڼ شمېر ښارونو کې د پوځي کودتا ضد لاریونونو یو ځل بیا زور واخیست، بلخوا په سوډان کې د امریکا دیپلوماتانو هڅې پیل کړي تر څو د سوډان مسئله حل کړي، په سوډان کې له تېرې یوې میاشتې را په دېخوا وضعیت کړکېچن شوی دی.

په ملګرو ملتونو کې د سوډان خاص استازي ”فولکر پرتس“ په لاریون کوونکو د امنیتي ځواکونو بریدونه غندلي او تائیدوي چې تر دا مهاله په یادو بریدونو کې اوو کسانو خپل ژند له لاسه ورکړی دی.

په سوډان کې د امریکا سفارت هم د امنیتي ځواکونو له تاوتریخوالي ډک چلند غندلی، د تاوتریخوالي له امله یو شمېر کسان ژوبل شوي هم دي.

دا ناکرارۍ له هغه وخته راپیل شوي چې کله ”جنرال عبد الفتاح البرهان“ د تېر میلادي کال اکتوبر میاشتې په ۲۵ مه نېټه د یوې کودتا له مخې واک ته ورسېده، له هغه راهیسې لږ تر لږه ۷۰ تنه لاریونوال وژل شوي دي.

د یادونې وړ ده چې هغه مهال لا په نړیواله توګه د سوډان پوځي کودتا وغندل شوه، امریکا او متحدینو یې، همدا راز ملګرو ملتونو اوسمهال په لاریون کوونکو برید په کلکو ټکو غندلی دی.

د سیاسي شنونکو په اند په سوډان کې پوځي کودتا ددې لامل شوه چې انتقالي حکومت چې د پوځ او ولسي وګړو لخوا په مشترګه توګه جوړ شوی و، له منځه ولاړ شي، دوی انتقالي حکومت ددې پاره ایجاد کړی و چې په ۲۰۲۳ میلادي کال کې به ټولټاکنې وکړي او یو مشروع نظام به د حکومت واګي په لاس کې واخلي.

که څه هم د کودتا ضد لاریونوال د امنیتي ځواکونو لخوا ځپل شوي خو بیا هم په ځینو ښارونو او لویو لارو کې په زرګونو خلکو لاریون ته دوام ورکړی دی.