امریکا: د واورې اورښت؛ د برېښنا سیستم متأثر او زرګونه الوتنې ځنډېدلي

د امریکا په مختلفو ایالتونو کې د توپاني واورې اورښت له امله د برېښنا سیستم متأثره شوی او زرګونه الوتنې ځنډېدلي دي، د امریکا له پلازمېنې واشنګټن سره نږدې ایالتونو کې زرګونه الوتنې ځنډېدلې دي.

د نړیوالو راپورونو له مخې، د واشنګټن په ګډون ختیځ ایالتونه لکه ورجینیا، جارجیا، شمالي او جنوبي کیرولاینا کې تېزې هواګانې، بارانونه او د توپاني واورې اورښت تر ټولو ډېر د برېښنا نظام زیانمن کړی دی.

په شمالي کیرولاینا کې د زیاتې واورې ورېدو له امله لږ تر لږه درې زره الوتنې منسوخ شوي دي او تقریبًا د ۱۴۵۰۰۰ وګړو برېښنا پرې شوې ده.

د امریکا د هوا پېژندنې ادارې په جارجیا، کیرولاینا او ورجینیا کې بېړنی حالت اعلان کړی دی، ویل کیږي چې له دغه توپان څخه متأثره غرییزو سیمو کې د ۴۵ سانتي متره واورې ورېدو اټکل شوی دی.

خو تر دا مهاله د مرګ ژوبلې او مالي تلفاتو راپور نه ورکړل شوی.