په فراه ولایت کې د الازهر له دینې مدرسې څخه پنځه ویشت (۲۵) تنه فارغ او د فراغت سند یې تر لاسه کړل.

دوشنبه د فراه ښار اړوند د مهاجر اباد کلي د الازهر له دینې مدرسې څخه پنځه ویشت (۲۵) تنه طالب العلمو حافظانو او قاریانو د ویاړ بګړۍ پر سر او د فراغت سند یې تر لاسه کړل.

یادې فراغت غونډې ته د فراه ولایت د نظامي او ملکي مسؤلینو په ګډون، ګڼ شمیر علماء کرام، سپین ږیري، خبریالان او ځوانان هم راغلي وو.

د الازهر دینې مدرسې مسؤل ښاغلي مفتي صاحب محمد دواد “محمدي” فارغ شویو حافظانو، قاریانو او د دوی پتمنو کورنیو ته د بګړۍ تړلو او فراغت مبارکۍ ترڅنګ له ټولو پلرونو څخه وغوښتل، چې تاسو د اولادونو د زده کړې او سالمې روزنې مسؤلین یاست، د دې لپاره چې اولادونه مو سالمه روزنه تر لاسه کړي، نو اړ یاست چې خپل اولادونه مو دینې مدرسو ته ولېږئ.

د یادونې وړ ده، چې یاده دینې مدرسه شاوخوا شپږ کاله کېږي، چې درنو هیوادوالو ته په دي برخه کې خپلې ګړندۍ کړنې ترسره کوي.