کابل ښاروالي: د دهن باغ څلورلارې په یوه ځانګړي سمبول ښکلې کیږي

الاماره (۱۴۴۴/ربیع الثاني ۲۷)د ښاري ښکلا د رامنځته کولو په موخه، په دویمې ناحیې پورې اړوند د دهن باغ څلورلارې د بیارغونې چارې چې، څه موده وړاندې پیل شوېوې، لاهم روانې دي.
د کابل ښاروالۍ د کلتوري چارو رئیس قاري ولي ګل جواد په دې هکله وویل: په یاده څلورلارې کې د ځمکې کُرې ته ورته په متحرکه بڼه یو سمبول جوړیږي چې چارې به یې تر راتلونکو ۱۵ ورځو پورې بشپړې شي.
دغه سمبول د ۸ مترو په قطر او لوړوالي او ۲ ټنه وزن سره، د کابل ښاروالۍ له بودجې څخه د یو میلیون افغانیو په لګښت جوړیږي، چې د برښنا په وسیله به په یوه دقیقه کې ۱۲ ځلې تاویږي.
په یاده څلورلارې کې د ځمکې کُرې له سمبول سربېره، زرغونه سیمه، کټارې، د ښکلا څراغونه، زینتي بوټي او جدولونه هم په پام کې نیول شوي دي.