په فراه ولایت کې مشهور غل او انسان تښتونکی (سید ستون) د ملي امنیت له بندخونې څخه د تیښتې پر مهال ووژل شو.

نن جمعه د ۱۴۰۰/۱۱/۱۵ نېټه، په فراه ولایت کې پېژندل شوی (مشهور) غل او انسان تښتونکی (سید ستون)، چې د ملي امنیت ریاست، په بندخونه کې تر کنټرول، څارنې او څیړنې لاندې و، د یادې بندخونې له څار (نظارت) خونې څخه د تیښتې پر مهال، د ملي امنیت ریاست ته نږدې په ۳ کیلو مترۍ کې د امنیتي ساتونکو له خوا ووژل شو.

په افغانستان، ایران او پاکستان هیوادونو کې په جنایي جرمونو، غلاوو، انسان تښتونو او نورو ناوړو کړنو پېژندل شوی (سیدستون د رفیع الله زوی)، فراه ولایت، خاکسفېد ولسوالۍ، د اسلام اباد کلي اوسېدونکی، څو ورځې وړاندې په هرات ولایت کې له یوې جرمي او غیر قانوني کړنې څخه وروسته، د دې ولایت خاکسفید ولسوالۍ ته راغلی و، چې د ا.ا.ا د زړورو امنیتي ځواکونو د چاڼیزو عملیاتو په ترڅ کې ونیول شو، له نیونې څخه وروسته د کنټرول، څارنې او څیړنې په موخه د ملي امنیت بندخونې ته راوړل شو.

د یادونې وړ ده، چې یاد غل او انسان تښتونکی په جمهوریت کې هم د یادو کړنو په تور نیول شوی، چې له وروستیو بدلونونو سره سم، له بندخونې څخه بیا ازاد او پرته له کومې ناستې څخه یې خپلو ناوړو کړنوته دوام ورکړل.