هلمند کي UNHCR  د ۲۲۳ اړمنو او بې وزلو کورنیو سره نغدي مرسته وکړه .

په دغه ولایت کي د مرستو په دوام نن د UNHCR مؤسسې په مالي ملاتړ ، په تطبیق د HRDA او د هلمند ولایت  د مهاجرینو ریاست په همکارۍ یو ځل بیا د مرکز او ولسوالیو څه باندي ۲۲۳ جګړه ځپلو، اړمنو او بې وزلو کورنیو سره د ۳۷۵ ډالرو ، چي ۳۶۰۰۰ زره افغانۍ کېږي نغدي مرسته وسول.

 

د یادو کورنیو سره د نغدي پیسو مرسته په دې موخه سوې ، څو په دغه نغدي پیسو کاري زمینې برابري کړي او یا هم ژمني توکي پرې واخلي.

 

د هلمند ولایت  د کډوالو او بيرته راستنېدونکو چارو ریاست رئیس مولوي الاداد انقیادي صاحب د باختر آژانس د خبریال ګل محمد غورځنګ سره د خبرو پر مهال وویل؛ دا هغه بې ځایه سوې کورنۍ دي چي اقتصادي ستونزي لري ، د جګړو پر مهال یې کورنه نړیدلي او یا هم زیاتي بې وزلي وي.

 

نوموړی وایي، د یادو کورینو سروې په شفافه توګه ترسره سوې او ټولي مستحقي کورنۍ دي،چي په وینا یې په راتلونکي کي به هم چاته اجازه ورنه کړي ، چي غیرو مستحقو کورنیو ته مرستي ور کړي.

 

د ګل محمد او عبدالسلام په نوم دوه تنه چي نن یې نغدي مرسته ترلاسه کړه د خوښۍ تر څنګ وویل؛ دا پیسې به یې تر ډېره اړتیاوي ورپوره کړي او زیاته یې کړه چي دوی به په دې پیسو اوړه ، غوړي او نور ژمني اړین توکي رانیسي .

نوموړو غوښتنه کول،چي اسلامي امارت او نور خیریه بنسټونه دي نوري مرستي هم راسره وکړي ، ځکه د ژمي په راتلو سره به یې اړیتا وي نوري هم زیاتي سي.

 

دا په داسي حال کي ده ، چي یوه اونۍ وړاندي هم په سنګین ولسوالۍ کي د ژوغورني نړیوالي کمېټي لخوا د ۵۰۰ جګړه ځپلو او غریبو کورنیو سره  د ۲۶۰۰۰ زره افغانیو نغدي مرسته وسول.

 

نېټه؛۱۴۴۳/۴/۲۶ هـ ق