له فرانسې څخه د اخیستل شوي رادار درې پایې هیواد ته رارسېدلي

د ملکي هوایي چلند ادارې رسنیو ته ویلي، چې د هوایي حریم د کنټرول لپاره له فرانسې څخه د ۱۱۲ میلیون یورو په ارزښت د اخیستل شوي رادار لومړی جوپه هیواد ته رارسېدلې ده، دغه خورا پرمختللی رادار د کابل نړیوال هوایي ډګر ټرانسپورټ او هوایی چلند ادارې ته سپارل شوی دی.

د معلوماتو له مخې، دا رادار به د کابل نړیوال هوایي ډګر سربېره بلخ او هرات هوایي ډګرونو کې هم نصب شي، ددې رادار هوکړه لیک د فرانسې له ټالس شرکت سره لاسلیک شوی دی.

د یاد تړون له مخې ښایي دغه پرمختللی رادار د ټول هیواد د هوایي حریم د کنټرول لپاره په ۱۲ سایټونو کې په کابل، بلخ او هرات کې په مرحله ییزه توګه ځای پر ځای شي، د اټکل له مخې ممکن دا چاره د ۲۰۲۳ میلادي کال تر پای ته رسېدو د مخه پوره شي.