سعودي: د حج ا و عمرې وزارت د عمره کوونکو لپاره نوي شرائط وضع کړي

د سعودي عربستان حکومتي سرچېنو ویلي، هغه عمره کوونکي چې د سعودي عربستان لخوا تصدیق شوی واکسین یې کړی وي، بغیر له کوم قرنطین څخه کولی شي د عمرې د اداء کولو سعادت حاصل کړي.

په اعلامیه کې راغلي، هغو کسانو چې د نړیوالې روغتیایي ادارې لخوا منظور شوی واکسین یې لګولی وي، سعودي ته په رسېدو سره سم به درې ورځې قرنطین کیږي له ۴۸ ساعتونو وروسته به یې د منفي کرونا ټیسټ کیږي او له هغه وروسته بیا کولی شي عمره اداء کړي.

د سعودي عربستان د مقاماتو لخوا ویل شوي، چې ټول هغه کسان چې غواړي دغه هیواد ته د عمرې د اداء کولو په موخه راشي، لازمي ده چې د خپلو هیوادونو لخوا یې واکسین تر سره کړی وي.

د یادونې وړ ده چې سعودي عربستان او یو شمېر نورو خلیجي هیوادونو د نوي کرونا ویروس د خپرېدو د وېرې له امله پر ۷ افریقایي هیوادنو د سفر بندیزونه ولګول، د نوي ویروس د وېرې له امله یو ځل بیا اندېښنې راولاړې شوې دي.

د سعودي عربستان حکومتي مقاماتو هم اوو هیوادونو ته پروازونه معطل کړي دي، په دغو هیوادونو کې جنوبي افریقا، نمیبیا، موزمبیق، زمبابوې او افریقایي هیوادونه شامل دي.