زابل مرکز قلات کې داکتوبر د ۷ د کرغیړن اشغال په اړه غونډه او مشاعره ترسره شوه

د زابل ولايت د اطلاعاتو او فرهنګ رياست په انګړ کې د اکتوبر اوومه د امريکايي اشغال تورې ورځې او شلو کالو د اورونو مزل تحليلي غونډه او مشاعره تر سره شوه.

نن پنجشنبه مازيګر مهال د زابل ميشتو لسګونو شاعرانو، اديبانو او فرهنګپالو ځوانانو او مشرانو د اکتوبر اوومه ورځ په ويناوو، مقالو او شعرونو سره  ولمانځله.

غونډه په تلاوت پيل شوه، لومړنۍ برخه يې ويناو ته ځانګړې شوې وه، ويناوالو ويناوې او مقالې وويلې او په دوهمه برخه کې مشاعره پيل شوه او شاعرانو خپل راوړي شعرونه ولوستل.

د يادونې وړ ده چي په مشاعره کې خواږه مترنم اشعار هم وويل شول.

غونډه د ماخستن تر ۷:۴۰ بجو پوري دوام وکړ چي په اختتامي دعا سره پاي ته ورسيده.