د یونسيف ادارې د عامه اړیکو مسئولينو د کندهار په اطلاعات او فرهنګ ریاست کي له خبريالانو سره ناسته ترسره کړه.

د پنج شنبې په ورځ د یونسيف ادارې د عامه اړيکو د مسئولينو له لوري د کندهار خبريالانو ته د پوليو واکسين اړوند یو ورځنی ورکشاپ داير سوی وو، چي پر مهال ئې د کندهار يو شمېر خبریالانو ګډون کړی وو.

د پروګرام په شروع کي د اطلاعات او فرهنګ رئیس مولوي نور احمد سعيد او مرستيال ئې شمس الله صميم هم ګډون وکړ.

د اطلاعات او فرهنګ رئیس مولوي نور احمد سعيد د خبرو پر مهال د یونسيف ادارې د ياد اقدام څخه هر کلی وکړ او زياته ئې کړه، چي دا ډول پروګرامونه بايد زیات او دوامداره سي.

نوموړي نه یوازي د يونسيف څخه د پوليو واکسین په برخه کي د ډېري همکارۍ غوښتنه وکړه، بلکي په نورو برخو کي ئې هم ګډه همکاري اړینه وبلل.

ښاغلي سعيد د خبریالانو څخه هم غوښتنه وکړه، چي د پوليو واکسين د عامه پوهاوي په برخه کي همکاري وکړي.

د پولیو د برخي مسئولین د ګوزڼ د پېښو په اړه وږغېدل او زياته ئې کړه، چي له تېرو ۱۴ میاشتو راهيسي په جنوب لويديځه حوزه کي د پوليو مثبته پېښه نه لرو.