د کندهار ولایت د اطلاعات او فرهنګ مرستيال د اطلاعات او فرهنګ له وزير سره وکتل.

د کندهار ولایت د اطلاعات او فرهنګ مرستيال ملا شمس الله صميم مرکز کابل ته د رسمي سفر په ترڅ کي د دروانې میاشتې ۲۳ نیټه د پنج شنبې په ورځ د اطلاعات او فرهنګ له وزير ملا خير الله خير خواه سره ولیدل.
ښاغلي صمیم د لیدني پر مهال لومړی د کندهار د اطلاعات او فرهنګ رياست د فعاليتونو، لاسته راوړنو او ټولو چارو په اړه هر اړخيز معلومات وړاندي کړل، د تېرو مياشتو د کاري راپور لنډيز او ستونزي ئې هم د اطلاعات او فرهنګ له وزير سره شریکي کړې.
نوموړي د کندهار د اطلاعات او فرهنګ رياست ځيني ستونزي، اړتیاوي او پيشنهادونه هم له وزير سره شريک کړل او په دې برخه کي ئې د وزارت همکاري اړينه وبلله.
ښاغلي صميم د اطلاعات او فرهنګ وزارت له رهبري په ځانګړي ډول ښاغلي وزير صاحب څخه مننه وکړه، چي په تیرو څو مياشتو کي ئې د نورو ولايتونو تر څنګ کندهار ته ځانګړې پاملرنه کړې ده.
د کندهار د اطلاعات او فرهنګ مرستيال ډاډ وړاندي کړ، چي د ریاست ټول کارکوونکي تر يوې ډېري منظمي رهبري لاندي خپل کارونه په ښه ډول مخته وړي او ټولي چاري ښې مخته رواني دي.
ښاغلي ملا خیر الله خيرخواه د کندهار د اطلاعات او فرهنګ د مرستيال تر خبرو اورېدو وروسته د ریاست کارونه، پلانونه او چاري ډېري ښه وبللې او د یو شمېر نورو کارونو د ترسره کولو لارښوونه ئې هم وکړه.
نوموړي مننه وکړه، چي د کندهار اطلاعات او فرهنګ رياست په منظم ډول کارونه مخته بيايي او تر ډېره حده ئې پراته خنډونه حل کړي دي.
ښاغلي خیرخواه د کندهار د اطلاعات او فرهنګ د مرستيال غوښتني او وړانديزونه هم واورېدل او په ډېر اطمینان سره ئې ډاډ ورکړ، چي په تدريجي ډول به نه يوازي د کندهار بلکي د ټول افغانستان د اطلاعات او فرهنګ رياستونو ته پاملرنه وکړي.
نوموړي په ځانګړي ډول د کندهار ستونزي مهمي وبللې، چي ډېر ژر به ئې د حل له پاره اقدامات ترسره سي.
د اطلاعات او فرهنګ وزير د تاریخي ابدو او اثارو پر ساتنه ډېر ټينګار وکړ، په دې برخه کي ئې نه يوازي د اطلاعات او فرهنګ رياست هڅي مهمي وبللې، بلکي د ولسي وګړو همکاري ئې هم اړينه وبلل.
د یادولو ده، چي په دې وروستیو کي ټولو امنيتي ځواکونو ته لارښوونه سوې، چي د تاريخي ابدو او تاريخي اثارو ساتنه په جدي توګه وکړي.