د ا.ا مسئولینو کندهاري تجارانو ته د بشپړي همکارۍ ډاډ ورکړ.

 

 

د اطلاعات او فرهنګ وزارت سرپرست محترم ملا خير الله خير خواه په کندهار کي د “سنو فارما” د درملو تولیدي فابرېکې څخه ليدنه وکړه، چي پر مهال ئې کندهاري سوداګر او پانګوال هم حاضر وه.

د اطلاعات او فرهنګ وزارت سرپرست په کندهار کي د درملو د دومره لويي او معیاري فابرېکې موجودیت د ټولو هيوادوالو له پاره د وياړ ځای یاد کړ او خوښي ئې څرګنده کړه، چي د “سنوفارما” د درملو توليدي فابریکه به تر ډېر ځایه د هیواد په کچه د درملو ستونزه حل او د وخت په تېرېدو سره به ئې تولید سوي درمل تر نورو هيوادونو پوري ورسيږي.

راغلو سوداګرو د اطلاعات او فرهنګ وزارت له سرپرست سره د پانګوني او سوداګرۍ په برخه کي د ځينو ستونزو او اندېښنو په شریکولو سره وویل چي د منظم برق نشتون یو لویه ستونزه ده چي د تولیدي فابرېکو د کار کولو مخ یې ډب کړې ده، هغوی پدې برخه کي د ا.ا څخه د بشپړي همکارۍ غوښتنه وکړه او په ځینو نورو برخو کي ئې د امکاناتو په برابرولو کي د اسانتياوو رامنځته کولو غوښتنه وکړه.

د ا.ا په استازیتوب د اطلاعاتو او فرهنګ وزارت سرپرست ښاغلي ملا خير الله خير خواه د بشپړي همکارۍ ډاډ ورکړ او له ټولو تجارانو او پانګه والو څخه ئې مننه وکړه، چي په هيواد کي دننه ئې د سختو حالاتو سره سره پانګونه کړې.

نوموړي یادونه وکړه، چي ا.ا به تجارانو ته د اسانتياوو په برابرولو کي د امکان تر حده هيڅ ډول امکانات درېغ نه کړي او په پای کي ئې یو ځل بیا ټول سوداګر په هيواد کي دننه پانګوني ته را وبلل.