د فراه ولایت د شیخ ابونصر فراهي بندر ته، د دې ولایت د والي او ور سره مل لوړ پوړو پلاوي ګډ سفر وکړ

نن د فراه ولایت والي، ښاغلي ملا نورمحمد “روحاني” صاحب، په داسې حال کې د فراه ولایت د شیخ ابونصر فراهي بندر ته سفر وکړل، چې د دې ولایت ګڼو لوړ پوړو پلاو هم ورسره ملتیا کوله، والي لومړی د دې بندر د سړک له رغنېزو چارو څخه لیدنه وکړه، ده د یاد سړک ټول کاري پرسونل، وسایل او رغنېزې چارې وڅېړلې.

 

د فراه ولایت والي، د شیخ ابونصر فراهي په بندر کې د ګمرک ریاست له مسؤلینو، د نفتي، ساختماني، ترباري او د بېلا بیلو توکو له سوداګرو سره ولیدل.

 

د فراه والي ښاغلي “روحاني” د ګمرک ریاست له ټولو څانګو څخه لیدنه وکړه او د دې ریاست د ګمرکي چوپړتیاوو وړاندې کولو پروسه یې وڅیړله.

 

د فراه والي د دغه ولایت د ګمرک له رئیس او یو شمیر ملي سوداګرو سره خبرې وکړي، د دوی اړوند خنډونه او ستونزې یې واوریدلې، ده د ګمرک ریاست، رئیس ته لارښوونه وکړه، چې ښه مدیریت او د نظام پیاوړتیا، مثبتو بدلونونو، ټولو ګمرکي او سوداګرېزو چارو ته ګړندۍ پاملرنه وکړي.

 

د فراه والي همدارنګه زیاته کړه، چې د سیمه ییزې ادارې یو له لومړیتوبونو څخه په دې ولایت کې د ګمرک د پام وړ وده او پرمختګ دی او پدې برخه کې باید لازم اقدامات ترسره شي.

 

د دې لیدنې په اخیرنیو شېبو کې د ګمرک ریاست مسؤلینو او ملي سوداګرو پر بېلا بیلو موضوعاتو باندې خبرې وکړي، دوی ټولو خپلې ټولې لاسته راوړنې او ستونزې والي صاحب ته واورولې.