د فراه ولايت د امربالمعروف او نهي عن المنکر ریاست رئيس د فراه پوهنتون څخه ليدنه وکړه

ــــــــ
نن سه شنبه ۱۹/۸/۱۴۴۳ هـ ق د فراه ولايت د امربالمعروف او نهي عن المنکر رياست رئيس ښاغلي مولوي عبدالغفار رحماني صاحب د فراه ولايت لوړو زده کړو مؤسسې څخه ليدنه وکړه.
په ياده ليدنه کي چي ګڼ شمير نورو علماء کرامو يې هم ملتيا کوله د فراه ولايت په لوړو زده کړو مؤسسه کي يې د لوړو زده کړو وزارت فوق العاده استازي مولوي نورالحق مظهري، ټول اداري پرسونل او استادانو سره وليدل او ټولو ته يې د امربالمعروف او نهي عن المنکر وزارت د لائحې سره سم د حق او خير توصيه وکړه او د مشرتابه لخوا را رسېدلي لاندي پنځه موارد يې د ټولو سره شريک کړه:
1 – ټول اداري او کادري پرسونل بايد ځانونه پر نبوي سنت برابر کړي.
2 – ټول ښځينه کارکوونکي بايد کار ته په پوره حجاب کي راسي.
3 – ښځينه پرسونل بايد د نارينه پرسونل څخه جلا په بېلو اطاقونو کي کار وکړي.
4 – ټول اداري او کادري پرسونل بايد د لمانځه پر وخت لمونځ په جماعت باندي آداء کړي.
5 – ښځينه مراجعين بايد د مراجعې په وخت کي پوره اسلامي حجاب ولري، د نه حجاب په صورت کي يې عريضه ورڅخه نه اخيستل کيږي.
په مقابل کي مولوي نورالحق مظهري صاحب د امر بالمعروف او نهي عن المنکر ریاست رئیس او راغلي پلاوي ته ښه راغلاست ووايه او په اصلاحي برخه کي يې د هر ډول همکارۍ ژمنه وکړه.
په آخر کي غونډه د مولوي نورالحق مظهري صاحب لخوا د دعائيې په کولو سره پای ته ورسېدل.