د غزني والي، د امر بالمعروف او نهي عن المنکر وزارت لوړ پوړي پلاوې ته ډاډ ورڪړ، چې په دې ولايت کې ټول خلک اسلامي مقدساتو ته درناوۍ کوي

په همدې موخه نن ورځ دوشنبه له غرمې مخکې دغزني ولایت والي مولوي محمد اسحاق ( اخندزاده) سربېره، د امر بالمعروف او نهی عن المنکر وزارت لوړپوړي پلاوي مولوي فضل الربي ، ورسره د مل پلاوي غړيو، لیدنه وکړه،
لومړی دغزني ولایت ښاغلي والي صاحب د امر بالمعروف او نهی عن المنکر وزارت پلاوي ته د ښه راغلاست ترڅنګ له نوموړي مننه وکړه،
چې دې ولايت ته یې سفر وکړ. نوموړي د امر بالمعروف او نهی عن المنکر پلاوي سره د غزنی ولايت په اړه هر اړخيزه معلومات شريک کړل.
ښاغلي اخندزاده صاحب، وويل د غزني ټول ولسونه مجاهد او په اسلام مين خلک دي او تل یې ا.ا.ا څخه په کلکه ملاتړ کړی.
په ورته مهال د امر بالمعروف او نهی عن المنکر پلاوي له والي څخه مننه وکړه، چې په دې ولایت کې یې د ولسونو لپاره ډاډمن امنيت رامنځته کړی. هغه د غزني له ټولو مجاهدينو څخه وغوښتل، چې د خپلو ولسونو سره ښه چلند وکړي او هیچاته زیان ونه رسوي.
نوموړي د غزني له ديني عالمانو هم وغوښتل، چې د خپلو ممبرونو له لارې دې خلکو ته عامه پوهاوی ورکړي او ولسونه دې د ا.ا.ا څخه ملاتړ ته راوبولي.
ښاغلي پلاوي وويل ، د ا.ا.ا پاليسي دا ده، چې هېڅوک نه شي کولای، چې د خلکو په شخصي حريم تېری وکړي ،
راغلي پلاوي له ديني عالمانو څخه وغوښتل چې دتېر په څېر په راتلونکې کې دې په دې ولايت کې دې د ټولو منکراتو څخه مخنيوۍ وکړي، ترڅو په ټولنه کې د جرايمو کچه راټيټه شي.

۱۴۴۳/۶/۲۱
۱۴۰۰/۱۱/۴