د دشت برچي سل بستریز روغتون کې ۷ څانګې فعالې او ګټې اخستنې ته وسپارل شوې

الاماره (۱۴۴۴/ربیع الثاني ۲۶)د عامې روغتیا وزارت مالي او اداري معین، مولوي محمد اسحق صاحبزاده د دشت برچي سل بستریز روغتون د وینې بانک، زېږنتون، تغذیې، داخله، ماشومانو څانګه، جومات او د روغتون وړکتون افتتاح او ګټه اخستنې ته و سپاره.
مالي او اداري معین د دې څانګو فعالېدل د روغتیایی عرضه خدماتو د ښه والي او د ناروغانو د روغتیایي وضعیت ته د رسیدګۍ په برخه کې ګټور وباله او وې ویل : « د اسلامي امارت رهبري او د عامې روغتیا وزارت هڅه کوي چې په ټول هېواد کې اړمنو کسانو ته د روغتیايي خدمتونو د وړاندې کولو لپاره ښه شرایط برابر کړي، تر څو نور د درملنې لپاره له هېواد بهر ته د تللو اړتیا نه وي.»
همدارنګه مالي او اداري معین د دشت برچي سل بستریز روغتون له روغتیايي کارکوونکو او د آی سي آر سي د دفتر له مسوولینو مننه او قدردانی وکړ چې د روغتون د دغو څانګو په فعالېدلو کې یې له عامې روغتیا وزارت سره همکاري کړې ده.