بدخشان: د پامیر ولسونو ته ژمنۍ مرستې ولېږل شوې

الاماره (۱۴۴۴/جمادي الاول ۹) د ریاست الوزراء مقام له خوا د سرحدونو، قومونو او قبايلو چارو وزارت تر سرپرستي لاندې د ټاکل شوي هيئت له خوا هغه ژمنۍ مرستې چي شاوخوا اتلس قلمه خوراکي او غير خوراکي توکې پکې وو د لوی او واړه پامير نماينده ګانو ته وروسپارل شوې.
د سرحدونو، قومونو او قبایلو چارو وزارت په مشري د مختلفو ارګانونو ګډ پلاوي د واخان ولسوالۍ ته سفر تر سره کړ.
ياد هيئت لومړی د واخان ولسوالۍ ګاز خان سيمې ته سفر وکړ او د لوی پامير د خلکو مشر او نماينده حاجي محمود ته يې مواد تسليم او د لارې د نشتون له کبله يې په ګودامونو کې ذخيره کړل.
دغه راز ياد هيئت د ژمنيو مرستو د پاتي کاروان په ملتيا د کوچني پامير پر لور وکوچيد چې د سرحد بروغيل په سېمه کې د لارې د بندېدو له کبله تم شو او د کوچني پامير د خلکو دريو نماينده ګانو ته چې د شوراګانو مشر حاجي بوتو هم ورسره وو مواد وسپارل شول.