د اولس لخوا د ټاکنو سرتاسري تحریم

دا ډیرې ورځې کیږې چې د کابل ادارې د مشر اشرف غني لخوا د راتلونکو انتخاباتو لپاره د ثبت نام بهیر رسما پرانیستل شوی او ورسره نوم لیکنې ته د خلکو د هڅولو په موخو د اجیرو رسنیو تبلیغات هم پيل شوي دي، خو بیا هم عام اولسي خلک نه دي حاضر شوي چې په دې پروسه کې ګډون وکړي او یا د راتلونکو ټاکنو لپاره خپل نومونه ثبت کړي.

د ثبت نام د پروسې په اړه ترسره شوې څیړنې ثابتوي چې تر اوسه پورې یوازې حکومتي چارواکو د نوم لیکنې لپاره اړوندو مراکزو ته مراجعه کړې، هغه هم په ډير کم شمېر. د مثال په ډول د بلخ پخواني والی عطاء محمد نور تېره ورځ اعتراف وکړ چې د بلخ په ښار کې چې درې نیم میلیونه تنه نفوس لري، یوازې شاوخوا درې نیم زره کسانو په ټاکنو کې د رایو اچولو لپاره نومونه ثبت کړي دي.

د نوملیکنې له پروسې سره د افغان اولس سرتاسري پریکون او نه ګډون په حقیقت کې د اشغال تر چتر لاندې د ټاکنو ډرامې ته هغه پریکنده اولسي ځواب یا غبرګون دی چې زموږ د مؤمن اولس د سیاسي شعور په لوړتیا دلالت کوي. عام اولس پوهیږي چې هیواد تر اشغال لاندې دی، د ټاکنو پروسه جعلي او کاذبه ده او د هیواد د زعامت ټاکلو واک د امریکایي اشغالګرو په لاس کې دی.

عام اولس چې د ټاکنو پروسه یې په سرتاسري پریکون سره تحریم کړې، د خپل دې موقف لپاره تر لمر روښانه دلائل لري. د اولس په یاد دي چې په تیرو ټاکنو کې نهایي پریکړه د چا لخوا وشوه او امریکایي چارواکو په څومره سپین سترګۍ زموږ د اولس سیاسي سرنوشت مسخره کړ.

د افغان اولس لخوا د ټاکنو د پروسې سرتاسري تحریم ټولو بهرنیو اشغالګرو، د هغوی پالیسي جوړونکو او حتی د هغوی عامو اولسونو ته دا پیغام لري چې افغان اولس نور په هیواد کې نه د هغوی پوځي شتون غواړي او نه هم د هغوی لخوا جوړ شوي حکومتونه، ټاکنیزې ډرامې او نورې پروسې د باور وړ ګڼي.

موږ امید لرو چې د افغان اولس دغه عملي غبرګون ته به نړیوال او په خاص ډول اشغالګر هیوادونه او د هغوی اولسونه په جدیت سره وګوري او په ژوره توګه به یې تحلیل کړي؛ ځکه کله چې یو اولس نه غواړي د چا اشغال ومني او یا یې د زور تر دموکراسۍ لاندې ژوند وکړي، نو بیا څنګه ممکنه ده چې په اوږده مهال کې په داسې ملت ځان وتپل شي؟ که خبره یوازې د وسلې په زور په ملت د ځان تحمیلولو وي؛ نو تاریخ ثابتوي چې د زور واکمني تر ډیره دوام نه کوي او له متداومې جګړې دواړو خواوو ته له زیانونو پرته بل هیڅ نتیجه هم نلري.