د اسلامي امارت د مسئولینو او پاکستاني پلاوي ترمنځ هراړخيزې خبرې وشوې

نن غرمه د افغانستان اسلامي امارت د ریاست‌الوزراء له اقتصادي مرستیال محترم ملا عبدالغني برادر اخوند سره د پاکستان د دفاع وزیر ښاغلي خواجه اصف په مشرۍ لوړپوړي پاکستاني پلاوي په ارګ کې و کتل. محترم ملا برادر اخوند سره تر ليدنې وروسته د پاکستاني پلاوي او افغان لوري ترمنځ مفصل کاري مجلس وشو، چې […]

نن غرمه د افغانستان اسلامي امارت د ریاست‌الوزراء له اقتصادي مرستیال محترم ملا عبدالغني برادر اخوند سره د پاکستان د دفاع وزیر ښاغلي خواجه اصف په مشرۍ لوړپوړي پاکستاني پلاوي په ارګ کې و کتل.
محترم ملا برادر اخوند سره تر ليدنې وروسته د پاکستاني پلاوي او افغان لوري ترمنځ مفصل کاري مجلس وشو، چې د ملي دفاع وزیر محترم مولوي صاحب محمد یعقوب مجاهد، د کورنیو چارو وزیر محترم خلیفه صاحب سراج الدین حقاني، د بهرنیو چارو وزیر محترم مولوي صاحب امیر خان متقي او د استخباراتو لوی ریاست مشر محترم ملا عبد الحق وثیق پهکې ګډون درلود، د دواړو هېوادونو ترمنځ پر ګڼو د لېوالتیا وړ مسايلو باندېمفصلې خبرې وشوې.
په ناسته کې د دواړو لوريو پر امنيتي اندېښنو، زموږ پر سيمه د ډرون الوتنو، د مخالفو وسله‌والو په فعاليت واضحې او مفصلې خبرې وشوې.
همداراز د دواړو هېوادونو ترمنځ پر ترانزیټ، تجارتي او اقتصادي اړيکو، د کرښې په اوږدو کې د تګ راتګ پر ستونزو او پاکستان کې د افغان مهاجرینو د مشکلاتو په اړه ګټور بحثونه وشول. دواړو لوريو وپتېيله چې اقتصادي او سوداګريز مسايل بايد د سياسي ستونزو له امله زيانمن نه شي.
په پای کې دواړو خواوو د خبرو او تفاهم له لارې د مسائلو پر حل او د سیاسي او اقتصادي روابطو په پراختیا او تقويې ټینګار وکړ.
ذبیح الله مجاهد د اسلامي امارت ویندوی
۱۴۴۴/۸/۱ هق
۱۴۰۱/۱۲/۳هـ ش ــ ۲۰۲۳/۲/۲۲م