د دایکنډي ولایت په اجرستان او ګيزاب ولسوالیو کې د تېرې اونۍ د پنجشنبې په ورځ د دیني مدرسو د زده کونکو ترمنځ تقریري مسابقې ترسره شوې.
دغه مسابقې چې د اسلامي امارت د تعلیم او تربيې او عالي تحصیلاتو د کمیسیون له لورې تنظیم شوې وې، د یاد ولسوالیوو د ټولو دیني مدرسو ۳۲ تنو زده کونکو پکې برخه اخيستې وه او پر ټاکلې موضوع “اسلام کې د ښځو حقوق” يې په زړه پوري تقریرونه وکړل.
د تقریرونو د ارزونې لپاره درې کسیزه پلاوي ټاکل شوي وو چې هر ويناوال ته يې د ټاکل شویو معيارونو له مخې نمرې و رکولې چې په پایله کې یې د اجرستان ولسوالۍ په تقریري مرکز کې حمیدالله دعظمت زوی، د محمودیه مدرسې زده کونکي لومړی مقام ترلاسه کړ، نعمت الله د ملامعصوم زوی، د هاشمیه مدرسې زده کوونکي دوهم مقام خپل کړ او محمدعمر د مولوي دین محمد زوی، د خلفاء راشدین د مدرسې زده کوونکي دریم مقام خپل کړ.
همداراز د ګیزاب ولسوالۍ په مسابقه کې لومړی مقام حضرت محمد د تائب خان زوی، د نورالمدارس د مدرسې زده کوونکي، دوهم مقام عبدالهادي د عبدالکریم زوی د هاشمیه د مدرسې زده کوونکي او دریم مقام محب د عبدالقدیم زوی، د دارالعلوم اسلامیه د مدرسې طالب العلم ترلاسه کړل.
په دې غونډو کې د تعلیم او تربیې او عالي تحصيلاتو د کميسیون د مسوولینو تر څنګ د سیمې علماء کرامو، قومي مشرانو، د مدرسو استاذانو او ګڼ شمېر طالب العلمانو ګډون کړی وو، د سیالیو په پای کې د معتبرو اشخاصو پر لاس لوړو نمرو ګټونکو ته د ستاينليکونو تر څنګ یوه اندازه نقدي انعامات ورکړل شول.
دغه دوه ورځنۍ غونډه د جمعې په ورځ مازديګر مهال د دعا په غوښتلو سره پای ته ورسېدله.
28/12/2018
