ټاکل شوې سبا د شنبې په ورځ چې د ۲۰۱۵ کال د می د میاشتې له ۲ نېټې سره سمون خوري په قطر هېواد کې یو دوه ورځنی څېړنیز کنفرانس دایر شي.
نوموړی څېړنیز کنفرانس د پګواش په نامه نړیوالې موسسې له خوا ترتیب شوی، چې له مختلفو هېوادونو څخه مختلف اشخاص ګډون پکې کوي، نوموړې موسسه یوه نړیواله بې پرې موسسه ده، مرکز یې په کاناډا کې دی، په لندن، سویس او ځینو نورو هېوادونو کې هم څانګې لري، نوموړې موسسه وخت په وخت د نړیوالو کړکیچونو په اړه په مختلفو ځایونو کې کنفرانسونه جوړوي او له هر ځای څخه د نظر خاوندان ورته راغواړي.
د یادونې ده چې په دې کنفرانس کې هر ګډون کوونکی په شخصي ډول ګډون کوي، هېڅوک د کوم جهت یا حکومت په استازیتوب ګډون نه کوي. دا چې دا یو څېړنیز کنفرانس دی هر ګډون کوونکی د مختلفو موضوعاتو په اړه خپل خپل نظر څرګندوني.
د افغانستان اسلامي امارت هم د تېر په څېر، لکه د جاپان او فرانسې په کنفرانسونو کې چې ګډون کړی و، په دې کنفرانس کې هم د ښاغلي شیر محمد عباس ستانکزي په مشرۍ یو اته کسیز پلاوی په همغه ډول ګډون کوي، تر څو د خپل ولس د مظلومیت داعیه او د اړونده موضوعاتو په اړه خپل نظر په خپله د نړیوالو تر غوږونو ورسوي، په دې اړه په کنفرانس کې د ګډون لپاره یوه بیانیه هم ترتیب شوې چې له درنو لوستونکو سره به په خپل وخت شریکه کړل شي.
باید ووایو چې په نوموړي کنفرانس کې د اسلامي امارت د سیاسي دفتر د پلاوي ګډون په هېڅ ډول د سولې او مذاکراتو د خبرو په معنی نه دی، او دا خبره مخکې له مخکې د پګواش له اړونده مسولینو سره واضح شوې او هغوی منلې ده، او ددې پخلی یې کړی چې په نوموړي کنفرانس کې هر کس په شخصي ډول ګډون کوي، نه د کوم جهت او یا حکومت په استازیتوب.
په نوموړي کنفرانس کې د اسلامي امارت د پلاوي نومونه په لاندې ډول دي:
۱ – ښاغلی شیر محمد عباس ستانکزی
۲ – ښاغلی مولوي جان محمد مدني
۳ – ښاغلي مولوي سید رسول حلیم
۴– ښاغلی مولوي شهاب الدین دلاور
۵ – ښاغلی قاري دین محمد حنیف
۶ – ښاغلی مولوي عبد السلام حنفی
۷ – ښاغلی محمد سهیل شاهین
۸ – ښاغلی حافظ عزیز الرحمن
ذبیح الله مجاهد د اسلامي امارت ویندوی
۱۲/۷/۱۴۳۶هــ ق
۱۲/۲/۱۳۹۴هـ ش ــ 2015/5/1م
