قزاقستان د بېړنیو چارو وزارت ویلي، د دغه هیواد د پوځ اړوند (انتونوف AN-26) ډوله پوځي الوتکې له پلازمېنې نور سلطان څخه الوت پیل کړی و، خو د نامعلوم لامل له کبله الماتي هوایي ډګر ته څېرمه لوېدلې ده.
د روسیې خبري رسنۍ انټرفاکس د راپور له مخې، دا الوتکه د قزاقستان د ملي امنیت د سرحدي ځواکونو اړوند وه، چې نن یې سقوط کړی دی او مرګ ژوبله یې را منځ ته کړې ده.
د قزاقستان د بېړنیو چارو وزارت همدا راز ویلي، په دې پېښه کې څلورو تنو خپل ژوند له لاسه ورکړی او دوه تنه په ټپي حالت کې روغتون ته لېږدول شوي دي.
هغه ویډیو او انځورونه چې په رسنیو کې خپاره شوي، لیدل کیږي چې له لوېدلې الوتکې او د پېښې له ځایه لوګي او د اور لمبې پورته کیږي، بلخوا د اور وژنې ټیمونه په اور باندې د قابو راوستلو په هڅه کې دي.
راشا ټوډې په لومړي سر کې راپور ورکړی و، چې د قزاقستان د پوځ یوې الوتکې د لارې په اوږدو کې سقوط کړی خو د ۶ تنو سپرو په اړه یې له څه ویلو ډډه کړې وه.
تر اوسه د قزاقستان حکومت او هوایي چلند ادارې د دې الوتکې د لوېدو لامل نه دی په ګوته کړی.
